سەنبىدە بەيجىڭ حيۋستونداعى جۇڭگو كونسۋلدىعىنا اقش قۇقىق قورعاۋ ورگاندارى قىزمەتكەرلەرىنڭ "ءماجبۇرلى تۇردە" باسىپ كىرگەنىن ايتىپ، ايىپتاعان. بۇل تۋرالى Suth China Morning Post حابارلادى.
جۇڭگو ءسىم وكىلى ۆان ۆەنبين جاساعان مالىمدەمەسىندە اقش-تىڭ كونسۋلدىققا كىرۋگە قۇقىعى جوق ەكەنىن جانە بەيجىڭ "قاجەتتى جاۋاپ قايتاراتىنىن" ەسكەرتكەن.
– قىتايدىڭ حيۋستونداعى باس كونسۋلدىعى ديپلوماتيالىق جانە كونسۋلدىق ءۇي، سونداي-اق قىتايدىڭ مەملەكەتتىك مەنشىگى. اقش كونسۋلدىق قاتىناستار تۋرالى ۆەنا كونۆەنسياسىنا جانە قىتاي-اقش كونسۋلدىق كەلىسىمىنە سايكەس بۇل نىساندى ەشقانداي تاسىلمەن بۇزباۋى كەرەك، – دەگەن جۇڭگو ءسىم وكىلى.
ۆانگ اقش-تىڭ بۇل قادامىنا "قاتتى نارازى" جانە "وعان تولىقتاي قارسى" ەكەنىن ايتىپ، بەيجىڭ ۆاشينگتونعا قاتاڭ ەسكەرتۋ بەرگەنىن مالىمدەگەن.
جۇما كۇنى حيۋستون كونسۋلدىعىنان جۇڭگو ديپلوماتتارىن شىعارۋدىڭ سوڭعى مەرزىمى وتكەننەن كەيىن، اقش مەملەكەتتىك دەپارتامەنتىنىڭ شەنەۋنىگى دەلىنگەن ەر ادام جانە باسقا بىرنەشە ادام كونسۋلدىقتىڭ ارتقى ەسىگىن كۇشپەن اشىپ كىرگەن.
حابارلامادا ايتىلعانداي، دەپارتامەنتتىڭ قىزمەتكەرلەرى وعان دەيىن ءۇش بولەك ەسىكتەن كىرۋگە تىرىسقان، ءبىراق كىرە الماعان.
ءبىراز ۋاقىتتان بەرى اقش پەن جۇڭگو اراسىندا شيەلەنىس كۇشەيە ءتۇستى. قۇراما شتاتتار پروكۋرورلارىنىڭ سوتقا بەرگەن مالىمەتتەرى بويىنشا، امەريكاداعى جۇڭگو زەرتتەۋشىلەرى ۆيزالىق الاياقتىعى ءۇشىن قاماۋعا الىنعان. ۆاشينگتون "ۆيزالىق الاياقتىق جاسادى جانە اسكەري بايلانىستاردى جاسىردى" دەپ كۇدىكتەنگەن جۇڭگو عالىمى سان-فرانسيسكوداعى جۇڭگو كونسۋلدىعىنا قاشىپ تىعىلعانىن مالىمدەگەن.
سارسەنبىدە ترامپ اكىمشىلىگى قىتايدىڭ حيۋستونداعى كونسۋلدىعىن 72 ساعات ىشىندە جابۋعا بۇيرىق بەرگەن.
اقش مەملەكەتتىك حاتشىسى مايك پومپەو ۆاشينگتوننىڭ شەشىمى قىتايدىڭ زياتكەرلىك مەنشىكتەردى "ۇرلاپ جاتقاندىعىنا" بايلانىستى قابىلدانعانىن مالىمدەگەن.
بەيجىڭ بۇل قادامدى "ساياسي ارانداتۋشىلىق" دەپ اتاعان.
ءبىراق ترامپ جۇڭگو كونسۋلدىقتارىنىڭ كوبىن جابۋعا بۇيرىق بەرەتىنى "ءارقاشان مۇمكىن" ەكەنىن مالىمدەگەن.
كەيىنىرەك جۇڭگو وڭتۇستىك-باتىستاعى چەندۋ قالاسىندا ورنالاسقان اقش كونسۋلدىعىن جابۋعا بۇيرىق بەرگەن. جۇڭگو بۇل قادامدى اقش-قا "قاجەتتى جاۋاپ" دەپ اتادى.
ۆاشينگتون بەيجىڭدى ساۋدا جانە كوروناۆيرۋستىق پاندەمياعا قاتىستى بىرنەشە رەت ايىپتاعان، سونداي-اق جۇڭگو گونكونگقا قاۋىپسىزدىك تۋرالى داۋلى جاڭا زاڭ قابىلدادى.
ال ترامپ قىتايدىڭ شىڭجاڭ پروۆينسياسىنداعى ەتنيكالىق قازاقتار مەن ۇيعىرلاردىڭ قىسىمعا ۇشىراۋىنا قاتىسى بار 50-گە جۋىق قىتايلىق كومپانياعا سانكسيا سالدى.
پىكىر قالدىرۋ